|
|
|
 |  |
|
Tsy hanary anao 'zahay, tsy handao anao hiverina, Fa raha mody izahay na tratra, dia tapahin-doha. Tapero. Rasata : Aiza aho ? Ahoana ity ? Ary iza ange hianao ? Sao hianao no Batsola ary fahababoako izao ? Batsola : Eny izaho no Batsola ! Ny tahotrao anefa esory Ary ampahalalaiko anao fa tsy babo hianao tsy akory ! Rasata : Babo aho matoa eto, nefa babo ho tena sahy Ka hiboitra tsotra izao ary hiseho ho lehilahy. Nanolotra ny aiko tsotra toy izay miamboho adidy. Komandy hova aho, eny, ary tena saro-bidy. Ny iheverako an; izany, ka aleoko maty eto Toy izany hivaha adidy. Henoy izany ka raiketo Fa na ho faty aza aho dia ny hiaro tena ihany. Tsy misy teny hafa intsony no hanampiko an' izany. Batsola : ... Sombinaiko ô, avia, ... Ento aho hanara-dia Fa izaho no babonao. Tsaroako menatra ny tenako Nefa tena fahareseko ka tsy mísy hiafenako ! Azoany natao tokoa ny namono anao izao Nefa aleoko aho no maty toy izay ho hianao. Raha mody aho izao dia ny aiko no ho taperina Satria nandrava fandresena ka nanao dia miverina. Meloka aho, ekeko izany, meloka amin' ny Tanindrazana. Meloka amin' ny fombanay haiko hatramin' ny fahazazako ! |
Meloka amin' ny Fanjakako fa manaiky ho baboina : Ary meloka amin' ny raiko satria ny fandovako foana. Vavy tokana aho manko. Hitanao amin' izany. Fa nafoiko noho hianao ny ahy rehetra eto an-tany. Tsy ho haiko velively na izany anefa Ny hanery ny fonao. Raha tianao ny hilefa Ka hamela ahy ho singany tsy hisy farany doria Dia ho faty eto aho. Lasa seron' ny Fitia ! ... Ary raha ho entinao satria efa babonao Dia hanara-dia anao izao ankehitriny izao. Rasata : Batsola ô, raha izany moa azonao hatao Ny hiara-miala eto izaho sy hianao Ka andeha tsy harahina amin' izay misy ahy Batsola : Efa tia anao aho, babo saina, fo, fanahy Koa tsy hanana safidy, sitra-po hafa intsony Afa-tsy ny sitrakao. Koa ny hevitrao vonony. Ireto miaramila ireto dia halefako hanjeny Tsy afa-mody intsony ireo ka hifidy izay iereny. Tsy hataoko ny hanery azy ho babo miaraka amiko. Ento aho raha sitrakao fa izany no ho mamiko. Rasata : Eny ary ry Amina, izaho koa tia anao Nefa tsy mpanjaka aho ka tsy vitako hatao Ny hampiray ny fokontsika. Fa hianao aza izany. Dia hamoy ny ainao raha miverina mankany Amin' ny tany misy anao. Nefa raha mba mahataona Filaminana izao dia haravoako manahoana ? |
|
|